Сибай институтында Бөйөк Еңеүҙең 80 йыллығына, махсус хәрби операцияла ҡатнашыусылар һәм уларҙың ғаиләләренә ярҙам итеү йылына арналған хәрби-патриотик айлыҡ дауам итә. Ошо көндәрҙә беҙҙең уҡыу йорто студенттары Айҙар Мәжитов менән осрашыу үткәрҙе. Айҙар Рәис улы Баймаҡ районы Темәс тарихты һәм крайҙы өйрәнеү музейының директоры, Башҡортостан Республикаһының атҡаҙанған мәҙәниәт хәҙмәткәре.
Тарихсы беҙгә 1812 йылғы Ватан һуғышының төп алыштары һәм ваҡиғалары, унда башҡорттарҙың ҡатнашыуы тураһында бик мауыҡтырғыс итеп һөйләне. Ул шулай уҡ башҡорт яугирҙарының кейемдәре, һуғыш ҡоралдары менән таныштырып үтте. Шул йылдарҙағы төрлө легендаларға, йырҙарға бәйле тарихи ваҡиғаларҙы ла хәтергә төшөрҙө. Бигерәк тә, Германияның Шварц ҡалаһындағы башҡорт уғы, "Төньяҡ амурҙары"ның ҡаһарманлыҡтары тураһында тыңлау ҡыҙыҡлы булды.
Айҙар Рәис улы 1812 йылғы Ватан һуғышын реконструкциялауҙа ҡатнашыуы һәм шул ваҡытта булған ҡыҙыҡлы хәлдәр менән дә уртаҡлашып үтте. Ҡыҙыҡлы һәм шул уҡ ваҡытта файҙалы сығышын ул ҡурайҙа башҡорт халыҡ көйҙәрен уйнау менән тамамланы.
