Башҡорт йыры" телевизион конкурсы лауреаты Айнур Туҡтаевтың Сибай институты студенттары менән бергә ойошторолған концерты Арыҫлан Мөбәрәков исемендәге Сибай башҡорт дәүләт драма театры сәхнәһендә үтте. Ул "Әсәйҙәр-тормош биҙәге " тип аталды һәм әле күптән түгел генә билдәләнгән әсәйҙәр байрамына арналды.
Сараға Сибай ҡалаһынан әлеге ваҡытта улдары махсус хәрби операцияла булған әсәйҙәр һәм институттың ижади түңәрәктәрендә шөғөлләнеүсе студенттарҙың әсәләре саҡырылған ине.
Сибай институты директоры Илдар Сәлихйән улы Хәмитов залда ултырыусы әсәйҙәрҙе байрам менән ҡотланы һәм вокал стдуияһында, "Ете ырыу" халыҡ бейеүҙәре ансамблендә әүҙем шөғөлләнеүсе студенттарҙың әсәйҙәренә Рәхмәт хаттары тапшырҙы.
Концертта Айнур Туҡтаев башҡарыуында заманса һәм ретро йырҙар яңғыраны. Вокал студияһында шөғөлләнеүселәр әсәйҙәргә булған һөйөүҙәрен үҙҙәренең йырҙары аша еткерҙе. "Ете ырыу" халыҡ бейеүҙәре ансамбленең дәртле бейеүҙәре берәүҙе лә битараф ҡалдырманы. Байрам концертын Башҡортостандың халыҡ артисткаһы Резедә Әминева биҙәне. Ошондай уҡ концерт программаһы менән Айнур Туҡтаев һәм институттың ижади төркөмө кисә Баймаҡ ҡалаһының Мәҙәниәт ижад йортонда сығыш яһаны.Концерттан йыйылған килемдең бер өлөшө махсус хәрби операцияла йөрөүсе яҡташтарыбыҙға ебәреләсәк.
