Өфө фән һәм технологиялар университетының Сибай институты вәкилдәре, атап әйткәндә, технология факультетының транспорт машиналарын һәм технологик комплексты хеҙмәтләндереү кафедраһы доценты, педагогика фәндәре кандидаты Гөлфиә Риза ҡыҙы Туйсина һәм уҡыу йортоноң матбуғат хеҙмәте етәксеһе Рәүилә Сәфәрғәле ҡыҙы Хәсәнова профориентацион эш сиктәрендә Баймаҡ районының Ниғәмәт урта мәктәбендә булды һәм юғары синыф уҡыусылары менән осрашты. Гөлфиә Риза ҡыҙы уҡыусыларға Сибай институтының барлыҡка килеүе, уның ҡаҙаныштары, мөмкинлектәре, бөгөнгө көндә ниндәй йүнәлештәр буйынса белгестәр әҙерләнеүе хаҡында төплө мәғлүмәт бирҙе. Ошонда уҡ уҡыусыларға институттың тулы йәшәйеше хаҡында фильм күрһәтелде.
Рәүилә Сәфәрғәле ҡыҙы уҡыу йортонда фән, тәрбиә эшенең юғары ҡуйылыуы, уҡыуҙан тыш студенттарҙың һәләттәрен камиллаштырыу буйынса түңәрәктәрҙең эҙмә-эҙлекле эш алып барыуы хаҡында һөйләп үтте. Осрашыу һуңында уҡыусылар үҙҙәрен борсоған һорауҙарға яуап алды. Һәр ҡатнашыусыға институт тураһында буклеттар таратылды.
